दुचाकीला वाचविण्याच्या प्रयत्नात एसटी पलटी
PCN Live
लातूर-नांदेड महामार्गावर भीषण अपघात झाला आहे. एका दुचाकीला वाचवण्याच्या प्रयत्नात एसटी महामंडळाची बस उलटल्याची घटना सोमवार दुपारी1.43 वाजण्याच्या सुमारास घडली.
या अपघातात 36 प्रवासी गंभीर जखमी झाले असून 5 जण अत्यवस्थेत असल्याची माहिती समोर आली आहे. ही दुर्घटना नांदगाव पाटीजवळ घडली आहे. अपघातातील जखमींना तातडीने विलासराव देशमुख शासकीय वैद्यकीय महाविद्यालय व सर्वोपचार रूग्णालयात उपचारासाठी दाखल करण्यात आले आहे. हा अपघात महामार्गावरील सीसीटीव्ही कॅमेऱ्यात कैद झाला आहे.
एसटी बसचा हा अपघात अतिशय भीषण होता, या भीषण अपघातात बसमधील 48 प्रवाशांपैकी 36 प्रवाशांना जबर मार लागला आहे. त्यापैकी, 5 जणांची प्रकृती अत्यवस्थ आहे. जखमींना तातडीने रुग्णालयात दाखल करून त्यांच्यावर उपचार सुरू असून याची माहिती नातेवाईक व कुटुंबीयांना देण्यात आली आहे. या अपघातात दोन प्रवाशांचे हात कोपऱ्यापासून तुटल्याचे देखील समोर आले आहे.
अपघाताची माहिती मिळताच पोलिस व जिल्हा प्रशासनाने अपघाताची दखल घेत मदत व बचावकार्य सुरू केले. अपघात जेव्हा झाला तेव्हा येथील स्थानिकांनी मदतीसाठी धाव घेतली व जखमींना बसमधून बाहेर काढण्यास मोठी मदत केली आहे. तसेच रुग्णवाहिका व पोलिस प्रशासनाला या घटनेची माहिती देण्यासही स्थानिकांनी मदत केली. त्यामुळे तातडीने बचावकार्य सुरू होण्यास मोठी मदत झाली आहे.
