पेट्रोल टँकर व ट्रकमध्ये समोरासमोर धडक सहा जणांचा होरपळून मृत्यू
bargal
चंद्रपूर / प्रतिनिधी : चंद्रपूर शहरालगत अजयपूर गावाजवळ पेट्रोल वाहतूक करणारा टँकर आणि लाकूड नेणाऱ्या ट्रकमध्ये समोरासमोर धडक होऊन भीषण आग लागली. ट्रकचे टायर फुटून ही आग आणखी भडकली आहे. हा अपघात इतका भीषण होता की त्यात सहा जणांचा होरपळून मृत्यू झाला आहे.
या अपघातामुळे संपूर्ण रस्ताभर आग पसरल्याने वाहतूक खंडित झाली. आगीच्या उंच ज्वाळांनी लगतच्या जंगलातील झाडेही आगीच्या विळख्यात सापडली. या अपघाताची माहिती मिळताच मूल-चंद्रपूर येथून अग्निशमन पथके रवाना करण्यात आली. मूल-रामनगर पोलिसांची पथके, अग्निशमन दल घटनास्थळी दाखल झाले आणि त्यानंतर आगीवर नियंत्रण मिळवण्याचं काम सुरू झालं.
या अपघातामुळे महामार्गाच्या दोन्ही बाजूस वाहनांच्या लांबच लांब रांगा लागल्या. दोनपैकी एका ट्रकमध्ये लाकूड असल्याची माहिती असून या आगीत चालक-वाहकांचे काय झाले याबाबत अद्याप माहिती मिळू शकलेली नाहीये. अपघातानंतर भीषण आग लागली. आग लागल्याने ट्रकचे टायर फुटल्याने आग आणखी भडकली.
मूल-चंद्रपूर अग्निशमन पथकांनी आगीवर नियंत्रण मिळवलं. मात्र, या आगीत सहा जण होरपळले असल्याची प्राथमिक माहिती समोर येत आहे. मात्र मृतदेहांची ओळख अद्याप पटलेली नाही, पोलीस तपास सुरू आहे. तसेच मृतकांचा आकडा आणखी वाढण्याची शक्यता आहे.
