का गेला त्या चौघांचा जीव घटनास्थळी तणावाचे वातावरण
bargal
बीड / प्रतिनिधी - गेल्या अनेक वर्षांपासून सरकारने वाळू उपशावर बंदी घातली आहे परंतु अवैध वाळू उपसा सुरूच आहे. त्याचे दुष्परिणाम माहीत असूनही कोणीही जबाबदारी घेण्यास तयार नाही. वाळू माफिया पैसे देऊन सर्व मॅनेज करतात. मात्र वाळू माफियांच्या वाळू उपश्याने चार चिमुकल्या मुलांचा बळी घेतलाय.
खेळण्यासाठी गेलेल्या चार मुलांचा वाळू उपसा केलेल्या खड्ड्यातील पाण्यात बुडून दुर्दैवी मृत्यू झाला आहे. ही घटना बीडच्या गेवराई तालुक्यात असणाऱ्या शहाजनपुर चकला या गावातील सिंदफणा नदी पात्रात, सातच्या दरम्यान घडली असून रात्री साडे आठ ते नऊच्या दरम्यान उघडकीस आली आहे. बबलू गुणाजी वक्ते, गणेश बाबुराव इनकर, आकाश राम सोनवणे आणि अमोल संजय कोळेकर अशी मृत मुलांची नावे असून ही सर्व मुले 9 ते 13 वयोगटातील आहेत.
दरम्यान या घटनेने मोठी खळबळ उडाली असून सध्या सिंदफना नदी पात्रात शेकडो नागरिकांनी एकच गर्दी केली आहे . घटनास्थळी नागरिक आक्रमक झाले असून जिल्हाधिकारी येऊन वाळू माफियांविरोधात ठोस कारवाई करत नाही, तोपर्यंत मृतदेह ताब्यात घेणार नसल्याचा आक्रमक पवित्रा नागरिकांनी घेतला आहे. त्यामुळं घटनास्थळी मोठे तणावाचे वातावरण निर्माण झाले आहे.
