इको कार कोसळली१०० फूट खोल दरीत
PCN Live
पुणे / प्रतिनिधी - पुण्यातील भोर - महाड मार्गावरील वरंध घाटात भीषण अपघात झालाय. ९ जणांना घेऊन जाणारी इको कार 100 फूट खोल दरीत कोसळल्याची दुर्दैवी घटना घडली. या अपघातात एक जणाचा मृत्यू झालाय, तर 8 जण जखमी आहेत. जखमींवर जवळच्या रूग्णालयात उपचार सुरू आहेत. जखमी व्यक्तींपैकी काही जणांची प्रकृती चिंताजनक असल्याचे सांगण्यात येतेय.
मिळालेल्या माहितीनुसार, इको कार महाडहून भोरच्या दिशेने येत होती. त्यावेळी पहाटे ४ वाजता वरंध घाटातील उंबरडे गावच्या हद्दीत कार अचानक १०० फूट खोल दरीत कोसळली. चालकाचे कारवरील नियंत्रण सुटल्यामुळे हा अपघात झाल्याची प्राथमिक माहिती मिळाली आहे. अपघातानंतर परिसरात एकच खळबळ उडाली.
वरंध घाटातील अपघाताची माहिती मिळताच पोलिसांनी घटनास्थळी धाव घेतली. त्याशिवाय बचाव पथकही तात्काळ पोहचलं. स्थानिक शिरगाव रेस्क्यू पथकाच्या सदस्यांनी तात्काळ घटनास्थळी धाव घेत पोलिसांच्या मदतीने जखमींना बाहेर काढलं. या अपघातात एका व्यक्तीचा मृत्यू झालाय.
शुभम शिर्के असं मृत्यू झालेल्या तरुणाचे नाव आहे. मंगेश गुजर (वय 26), आशिष गायकवाड (वय 29), सिद्धार्थ गंधणे( वय 26), सौरभ महादे (वय 22), गणेश लवंडे (वय 27), अमोल रेकीणरं (वय 27), यशराज चंद्र (वय 22), आकाश आडकर (वय 25) ही जखमी व्यक्तींची नावे आहेत. भोर पोलिसांकडून घटनेचा अधिक तपास सुरू करण्यात आलाय.
